A wannan zamanin da ake ci gaba da yaki da gurbatar muhalli a duniya, bukatar fadada hanyoyin amfani da makamashi mara gurbata muhalli abu ne mai matukar muhimmanci, wanda zai taimaka wajen bunkasa kyawun muhalli da inganta lafiyar al’umma.
Wannan na daya daga cikin dalilan da ya sa kasar Sin ta dukufa wajen samar da mafita game da gurbatar muhalli, ta hanyar amfani da ababen hawa masu amfani da lantarki, wannan fasahar ci gaba kuma ba ta takure ta a iya kasar ta ba, ta ci gaba da fadada ta zuwa kasashen duniya domin karfafa yin kaura zuwa amfani da makamashi mai tsafta.
Kazalika wannan mataki da ta dauka na taimaka mata wajen bunkasa tattalin arzikinta da kuma inganta hadin gwiwa da sauran kasashen da take hulda da su, musamman kasashen Afrika da ke kokarin tasowa.
Misali, a ranar Talatar da ta gabata kamfanin kera motoci na kasar Sin Sany, ya kaddamar da manyan motocin dakon kaya masu amfani da lantarki a kasar Zambiya, yayin da kasar ke ci gaba da kokarin habbaka amfani da motocin sufuri marasa gurbata muhalli.
Wang Chao, wakilin kamfanin kere-keren kayayyaki na Sany ya bayyana wannan ci gaba na amfani da manyan motocin dakon kaya masu amfani da lantarki a matsayin wani mataki mai muhimanci, wajen bunkasa zabin amfani da motocin sufuri a kasar, yana mai karawa da cewa, kamfanin Sany zai yi aiki kafada da kafada da kananan ‘yan kasuwa domin samar da mafita yayin da kamfanin ke kokarin shimfida tsarin samar da damammaki a nan gaba.
A jawabin da ya gabatar ministan ayyukan more rayuwa da raya birane na kasar Zambiya, Collins Nzovu, ya ce wannan babban ci gaba ne a fannin ayyukan sufuri na kasar, sannan motocin masu amfani da lantarki za su habaka ingancin aiki, rage tsadar harkokin gudanarwa, da kuma jagorantar komawa tsarin amfani da sufuri mara gurbata muhalli.
Nzovu ya kara da cewa, shirin ya yi dai-dai da ajandar gwamnatin kasar na karfafa zirga-zirgar ababen hawa masu amfani da lantarki, kazalika gwamnati za ta samar da kayayykin da ake bukata da suka hada da tsarin hanyoyin cajin ababen hawan, domin hanzarta komawa tsarin amfani da ababen hawa masu amfani da lantarki.
Idan wannan ci gaba ya ci gaba da fadada a kasashen nahiyar Afrika, zai matukar taimakawa nahiyar wajen samun ci gaba ba tare da samun gurbatar muhalli ba. (Suleiman Suleiman Ibrahim)
