An kaddamar da makon teku na duniya na shekarar nan ta 2026, a jiya Alhamis 5 ga watan nan na Nuwamba a birnin Xiamen na lardin Fujian dake kudu maso gabashin kasar Sin. Yayin kaddamar da makon na teku, an fitar da sakamakon ci gaba guda biyar, ciki har da kundin da aka wallafa game da kananan tsibiran cikin teku, da wasu bayanai na hakikanin alkaluma game da muhalli da muhallin halittu.
Kazalika, an tsara gudanar da harkoki 33 yayin makon, wadanda suka hada da tarukan karawa juna sani game da kimiyyar teku, da muhallin halittu, da masana’antu da kulla alakokin kasuwanci masu nasaba da teku, ta yadda za a kai ga kara ingiza tsarin jagorancin teku na kasa da kasa, da bunkasa tattalin arziki mai nasaba da teku bisa babban matsayi.
Bugu da kari, an fitar da wani rahoto da harsuna biyu dangane da matsayi, da rawar takawa, da ma makomar yarjejeniyar da aka kulla karkashin dokar MDD ta kare teku, da wanzar da amfani da yankunan rayayyun halittun teku, kari kan yarjejeniyar yankunan kasashe ko BBNJ Agreement, da kuma rawar da kasar Sin ke takawa game da hakan.
Rahoton wanda cibiyar lura da tsarin ci gaban harkokin teku ta kasar Sin ta tsara, karkashin ma’aikatar albarkatun kasa ta Sin, ya fayyace muhimmancin aiwatar da yarjejeniyar, da ma irin gudunmawar da kasar Sin ke bayarwa a fannin tattauna yiwuwarta da ma aiwatar da ita. (Saminu Alhassan)
