Babbar Kotun Tarayya da ke Abuja ta amince da bayanai da bidiyoyin mutane shida da ake zargi da yunƙurin juyin mulki suka bayar a matsayin hujja, bayan ta yi watsi da iƙirarin cewa an tilasta musu bayar da bayanai ta hanyar azabtarwa.
Mai shari’a Joyce Abdulmalik ta ce babu wata hujja da ta nuna cewa an azabtar da waɗanda ake zargin yayin yi musu tambayoyi, tare da bayyana cewa sun bayar da bayanan ne bisa raɗin kansu.
Daga cikin waɗanda ake zargin akwai mai Manjo-Janar Mohammed Gana (mai ritaya) da Kyaftin ɗin Rundunar Sojin Ruwa (mai ritaya) Erasmus Victor da wasu mutane huɗu.
Ana tuhumar su da laifuka 13 da suka haɗa da cin amanar ƙasa, ta’addanci, ɓoye bayanan sirri na tsaro da kuma halatta kuɗaɗen haram da suka shafi ɗaukar nauyin ta’addanci.
Kotun ta dage sauraron ƙarar zuwa ranakun 7 da 10 ga watan Disamba domin ci gaba da shari’ar.
