Ma’aikatar kasuwanci ta kasar Sin da jami’ai na jihar Mongolia ta Gida ta kasar, sun yi cikakken bayani game da aikin raya sabon yankin ciniki cikin ‘yanci na jihar Mongolia ta Gida, tare da alkawarin kokarin mayar da yankin zuwa cibiyar bude kofa da misalin ci gaba mai inganci.
Da ya ke jawabi ga majalisar gudanarwar kasar, Yuan Xiaoming, mataimakin ministan kasuwanci na kasar, ya ce ana kokarin mayar da hankali kan ingantawa da karfafa karfin da ake da shi da kuma lalubo sabuwar dabarar hada kasuwannin cikin gida da na ketare.
Jihar Mongolia ta Gida mai mazauni a iyakokin yankunan arewa maso gabas da arewaci da arewa maso yammacin kasar Sin, na kuma iyaka da kasashen Rasha da Mongolia. Haka kuma, ta kasance gaba-gaba cikin manufar bude kofa ta kasar Sin a yankin arewaci. Bugu da kari, tana da tashoshin jigilar kayayyaki 20 dake bude ga kasashen waje, kuma ita ce jiha mai matsayin lardi kadai na kasar da sassan gabashi da tsakiya na layukan dogon da suka hada kasar da Turai, suka ratsa ta cikinsa.
Yankin gwajin na ciniki cikin ‘yanci ya mamaye murabba’in kilomita 119.74. Haka kuma, yana da wasu rassa 3 a Hohhot, babban birnin jihar Mongolia ta Gida mai cin gashin kanta da Manzhouli, birnin da ke kan iyakar kasar Sin a yankin arewaci, da Erenhot, mai tashar kan tudu da ke kan iyakar Sin da kasar Mongolia. Kuma an dorawa kowane daga cikinsu aikin da ya bambanta da sauran, tare da aikin raya masana’antun da suka dace da yanayin wuraren. (Fa’iza Mustapha)
