Kasar Sin ta fara aikin gina katafariyar hanyar ruwa, ciki har da wadda ake sa ran za ta zama hanyar ruwa mai dagawa da saukar da jiragen ruwa mafi girma a duniya, biyo bayan karuwar bukatar jigilar jirage a yankin kogin Yangtze, kogi mafi girma na 3 a duniya.
Mataimakin firaministan Sin Ding Xuexiang, wanda kuma mamba ne na kwamitin dindindin na ofishin siyasa na kwamitin kolin JKS, shi ne ya kaddamar da ginin sabuwar hanyar ruwa ta babbar madatsar ruwa ta Three Gorges, a wani biki a Yichang dake lardin Hubei na tsakiyar kasar Sin.
Aikin da zai lakume yuan biliyan 77.2 kwatankwacin kimanin dala biliyan 11.3, zai kara tagwayen hanya masu hawa 5 a arewa da hanyar ruwa da ke akwai a babbar madatsar ruwa ta Three Gorges, wanda shi ne aikin adana ruwa mafi girma a duniya. Haka kuma, aikin ya shafi daukaka kayayyakin kula da zirga-zirgar jiragen ruwa a wata karamar madatsar ruwa dake gefe. Idan aikin ya kammala, zai ninka abin da ake jigila ta babbar madatsar ruwa ta Three Gorges a duk shekara, zuwa ton miliyan 336. (Fa’iza Mustapha)
Discussion about this post