Ma’aikatar kula da cinikayya da wasu sassan gwamnati 8 na kasar Sin, sun fitar da wasu matakai 19 na inganta ci gaban bangaren bayar da hidimomi a cikin gida da bunkasa sayen hidimomi da kawar da abubuwan da ke kawo cikas ga ci gaban bangaren.
Wadannan matakai sun shafi bangarori 5 da suka hada da: kara tallafawa kamfanonin bayar da hidimomi na cikin gida da karfafa gwiwar samar da sabbin ka’idojin aiki da karfafa horon sana’o’i da inganta tsarin dandalin bayar da bayanan rance da karfafa tubalin raya masana’antar.
Suna karfafawa kamfanonin inshora gwiwar samar da hidimomin da suka dace da bangaren, da tallafa wa kamfanonin bayar da hidimomi na cikin gida wajen shiga tsarin bayar da kulawa mai dogon zango da kyautata tsarin inshora ta jama’a tsakanin masu bayar da hidima na cikin gida da ba su da kayyadadden lokacin aiki.
Matakan suna kuma taimakawa yankunan da suka cancanta lalubo hanyoyi bisa doka na kare hakkoki da muradun ma’aikata da tsara ka’idojin aiki ga kamfanonin bayar da hidima na cikin gida da bayar da yarjejeniyar matakan ingancin hidimomi.
Haka kuma, suna kira da sabunta ka’idojin ingancin aiki na kasa da inganta tantance matakan fasahohin sana’a.
Bugu da kari, matakan suna karfafa tantance tsarin bayar da rance da raba bayanai da inganta tsarin kwangiloli da ingancin masana’anta da nazarin ingancin hidima da sa ido sosai kan farashi. (Mai Fassara: Fa’iza Mustapha)
