An gabatar da sabbin fasahohin zamani iri-iri a gun bikin baje koli na motoci na kasa da kasa na birnin Beijing karo na 19 na shekarar 2026. Kamfanin kera motoci na Volkswagen na kasar Jamus ya gabatar da motoci 10 a gun bikin, a cikinsu guda 4 sababbi ne da aka gabatar da su a karo na farko a duniya, wadanda kasar Sin ta jagoranci, da yin nazari wajen samar da su.
A ganin kafofin watsa labaru na kasashen waje, kasar Sin ta kasance tamkar wurin horo mafi tsauri ga masu kera motoci na duniya.To ko me ya sa kasar Sin ke taka irin wannan muhimmiyar rawa a sha’anin kera motoci na duniya?
Babban sakataren kungiyar hadin gwiwa kan kasuwannin motoci na kasar Sin Cui Dongshu, ya bayyana cewa, kasar Sin tana da fifiko wajen kirkiro sabon tsarin kera motoci a duniya, a sakamakon inganta fasahohin baturin mota, da tsarin tukin mota mai zaman kansa, da motoci masu dauke da fasaha da sauransu. Kasar Sin ta kasance muhimmin wuri na kirkire-kirkire a sha’anin kera motoci na duniya.Ta hanyar bikin baje koli na motoci na kasa da kasa na birnin Beijing, ana iya ganin cewa, kasar Sin tana kokarin bude kofa, da yin hadin gwiwa don zurfafa huldar dake tsakaninta da sassan duniya, da sa kaimi ga more fasahohin zamanantarwa irin na kasar Sin ga sauran kasashen duniya baki daya. (Zainab Zhang)
