Rahoton binciken da hukumar harkokin duniya ta Chicago ta Amurka ta fitar a jiya Litinin 21 ga watan nan ya nuna cewa, kashi 57 bisa dari na al’ummar Amurka suna ganin ya kamata Amurka ta yi hadin gwiwa, da tuntuba da Sin cikin kwanciyar hankali, wanda hakan ya wanzar da yanayin da al’lummar Amurka ke cike na karkata zuwa goyon bayan tuntuba da Sin tun daga shekarar 2024.
Rahoton ya ce, binciken da hukumar ta yi a shekarar 2025, ya nuna cewa ‘yan jam’iyyar Democrat sun fi karkata ga goyon bayan tuntuba da Sin, kuma sabon binciken ya gano cewa, ‘yan jam’iyyar Republican ma sun fara canja ra’ayinsu zuwa goyon bayan tuntuba da Sin. Adadin ‘yan jam’iyyar Republican da ke goyon bayan hadin gwiwa da tuntuba da Sin ya karu da kashi 10 bisa dari idan an kwatanta da na shekarar 2025, wanda ya kai matsayin koli tun daga shekarar 2019.
Rahoton ya yi la’akari da cewa, dalilin da ya sa al’ummar Amurka ke kara goyon bayan tuntuba da Sin shi ne, yawan Amurkawa da ke daukar Sin a matsayin barazana yana raguwa. Idan an kwatanta da shekarar 2021, a yanzu Amurkawa da yawa suna ganin cewa, Sin na kara samun girmamawa a duniya.
An gudanar da wannan bincike ne tsakanin ranar 10 zuwa 21 ga watan Yuli na bana, kan mutane 2,156 a jihohi 50 na Amurka da kuma babban birnin Washington. (Amina Xu)
