Kwanan nan, wani dan Birtaniya mai gabatar da shirye-shirye a shafin yanar gizo da ke zaune a kasar Sin ya gudanar da wani gwaji, inda ya ajiye kwamfutar tafi-da-gidanka a kan teburin wani shagon shan kofi, sannan ya tafi, bayan awa daya ya koma, kuma ya samu kwamfutar a inda ya bar ta.
Ya ce hakan “Abin mamaki ne” yayin da yake kallon kyamarar da ya boye a wurin. Irin wadannan “gwajin tsaro” na kara zama sabuwar hanya ga ’yan kasashen waje ta fahimtar Sin.
A halin yanzu, Sin tana daya daga cikin kasashen da suka fi karancin aikata laifukan kisan kai, da harbe-harben bindiga, da kuma laifukan ababen fashewa a duniya.
A cewar rahoton kamfanin Gallup na Amurka mai taken “Rahoton Tsaron Duniya na 2025”, yanayin tsaro da kuma “ma’aunin doka da oda” na al’ummar Sin, sun fi na manyan kasashen yammacin duniya.
Amma abun tambaya a nan shi ne ko ta ya ya kasar Sin ta kai ga samar da yanayin tsaro mai inganci ga jama’arta? Lu Jiehua, farfesa ne a jami’ar Peking, ya kuma bayyana cewa tun daga fayyace matakan da aka dauka, fasahar zamani da ingantaccen tsarin shugabanci dake hada kan jama’ar Sin, sun samar da “tsarin tsaro” mai karfi.
A dayan bangare mai zurfi kuma, yayin da ci gaban zamanantarwa irin ta Sin ke inganta, yanayin rayuwar al’ummar kasar yana kyautatuwa, kuma yanayin tsaronsu yana kara zama mai karko.
A halin yanzu, bisa karuwar rikice-rikicen siyasar shiyya-shiyya na duniya, da rashin kwanciyar hankali na kasa da kasa, kimar wannan yanayin tsaro da Sin ta samar ya kara daraja.
Mutane sun gano cewa lallai kasa za ta iya zama “mai kiyaye daidaito” a duniya mai cike da rudani ta hanyar yin aikinta da kyau. (Safiyah Ma)
