Babbar Kotun Jihar Kaduna ta ɗage ci gaba da shari’ar tsohon gwamnan jihar, Nasir El-Rufai, kan zargin almundahana da kuɗaɗe zuwa ranakun 30 ga watan Nuwamba da 1 ga watan Disamban 2026.
An ɗage shari’ar ne a ranar Talata domin ci gaba da yi wa ƙwararren jami’in hukumar tsaro ta farin kaya (DSS) kan binciken na’urorin sadarwa, Shegun Kayode, tambayoyi a kotu.
Alƙalin kotun, Mai Shari’a Darius Khobo, ya yi watsi da ƙin amincewa da shaidar da lauyoyin El-Rufai suka yi, inda ya ba da damar ci gaba da sauraron shaidar ƙwararren duk da cewa ba a saka sunansa cikin jerin shaidun masu gabatar da ƙara ba.
Kayode ya shaida wa kotun cewa DSS ta binciki wasu sautin murya da bayanan sadarwa da ake zargin suna da alaƙa da El-Rufai da wasu abokansa, bisa buƙatar Hukumar Yaƙi da Cin Hanci da Rashawa (ICPC).
Ya yi zargin cewa sautin muryar ya ƙunshi tattaunawa kan shirye-shiryen kawo cikas ga binciken da Hukumar Yaƙi da Yi wa Tattalin Arziki Ta’annati (EFCC) ke gudanarwa, da kuma zargin ware dala 500,000 da dala 100,000 domin biyan jami’an da ke bincike.
Sai dai har yanzu kotu ba ta tabbatar da waɗannan zarge-zarge ba.
ICPC na tuhumar El-Rufai da laifuka tara da suka haɗa da zargin cin hanci da rashawa da amfani da muƙami ba bisa ƙa’ida ba a lokacin da yake mulkin Kaduna.
Zarge-zargen sun haɗa da almundahana da kuɗaɗen gwamnati, bayar da kwangilar CCTV ba bisa ƙa’ida ba da kuma almundahana da kuɗin rancen Bankin Duniya.
El-Rufai ya musanta dukkanin zarge-zargen da ake masa.
Kotun za ta ci gaba da sauraron shari’ar a ranakun 30 ga watan Nuwamba da 1 ga watan Disamba domin ci gaba da binciken shaidar jami’in DSS.
