Wata mai ciki Jamila na hannun ’yan bindiga makonni uku bayan sun sace ta a gidanta da ke Millennium City, a Jihar Kaduna.
Rahotanni sun ce cikin da ta ke ɗauke da shi ya zube yayin da ta ke tsare a hannunsu.
An sace Jamila ne ranar 6 ga watan Oktoba tare da Abubakar Zakka, matarsa da jaririyarsu ‘yar watanni shida a Ƙaramar Hukumar Chikun.
Daga baya an saki iyalan, amma Jamila har yanzu tana hannun masu garkuwa da mutane.
A wani lamari makamancin haka, matar Sikiru Shuaibu da ɗansa su ma suna hannun ’yan bindiga bayan sun kashe Shuaibu yayin harin da suka kai ranar 1 ga watan Oktoba.
Haka kuma, an ruwaito cewa an sace wasu mutane shida a yayin wani hari da aka kai Nurus-Suraj Estate ranar 27 ga watan Oktoba.
Sai dai mazauna unguwar Kyauta da ’yan banga sun yi nasarar fatattakar wasu ’yan bindiga da suka yi ƙoƙarin kai hari yankin a daren ranar.
Shugaban rundunar haɗin gwiwa ta sa-kai (JTF) a yankin, Nuradeen Abubakar Nababan Yawo, ya tabbatar da faruwar lamarin tare da yaba wa jami’an tsaro bisa gaggawar kai ɗauki.
