Ana sa ran Shugaban Ƙasa Bola Tinubu zai gabatar da kasafin kuɗin shekarar 2027 ga Majalisar Tarayya kafin ranar 31 ga watan Disamba, 2026.
Ƙaramar Minista a Ma’aikatar Kasafin Kuɗi da Tsare-tsaren Tattalin Arziƙi, Doris Uzoka-Anite, ce ta bayyana hakan a ranar Laraba bayan taron Majalisar Zartarwa ta Tarayya (FEC).
Ta kuma ce majalisar ta amince da Tsarin Ci Gaban Ƙasa na shekarun 2026 zuwa 2030, tare da sabbin matakan yaƙi da ƙarancin abinci mai gina jiki ga yara da inganta samar da abinci a ƙasar.
A wani ɓangare kuma, Ministan Kuɗi, Taiwo Oyedele, ya ce shirin rancen dala biliyan 21.7 da gwamnati ta gabatar na nufin zuba jari a manyan ayyuka na tsawon lokaci, ba wai kashe kuɗin nan take ba.
Ya ce dala biliyan 10.6 za a ware domin manyan ayyukan sufuri, ciki har da babbar hanyar Sakkwato zuwa Badagry, hanyar bakin teku ta Legas zuwa Kalaba, da layin dogo na Kano zuwa Kaduna.
Oyedele ya ƙara da cewa sama da dala biliyan 7.9 za a samu daga ƙungiyoyin bayar da tallafin ci gaba na ƙasashen duniya, ciki har da Bankin Duniya, a matsakaicin kuɗin ruwa na kashi 2.1 cikin ɗari.
Ya kuma bayyana cewa sama da gidaje miliyan 10 sun karɓi tallafin kuɗi da ya haura naira biliyan 600, yayin da Asusun Ba da Lamunin Ilimi na Nijeriya (NELFUND) ya bayar da naira biliyan 372.6 ga ɗalibai sama da miliyan 1.5.
Bugu da ƙari, sama da ƙananan sana’o’i 800,000 sun amfana da lamuni masu ƙarancin ruwa, wanda bai kai kashi 10 cikin ɗari ba.
