Kudin shigar da gwamnatin kasar Sin ke samu ya karu da kashi 4 cikin dari a watanni biyar na farkon shekarar 2026, idan aka kwatanta da na makamancin lokaci na shekarar da ta gabata, a cewar wasu bayanan hukuma da aka fitar a yau Litinin, inda hakan ke nuna ci gaba da samun karuwar kudin shigar.
Jimillar kudin ta kai yuan tiriliyan 10.0465 (kimanin dalar Amurka tiriliyan 1.47) a tsakanin Janairu zuwa Mayu, kamar yadda bayanan ma’aikatar kudi ta kasar suka bayyana. Yawan karin da ake samu ya kai kaso 0.5 cikin dari, inda ya zarce wanda aka samu a cikin watanni hudu na farkon bana.
Kudin da ake kashewa daga kasafin kudin gwamnatin kasar Sin ya kai yuan tiriliyan 11.3877 a cikin watanni biyar na farkon 2026, wanda ya karu da kashi 0.8 cikin dari idan aka kwatanta da na makamancin lokaci a shekarar da ta gabata, inda aka ba da goyon baya sosai ga kashe kudade a muhimman fannoni. (Mai fassara: Abdulrazaq Yahuza Jere)
Discussion about this post