Kwamitin Ba Da Shawara Kan Hadin Gwiwar Kasa Da Kasa Na Dandalin BRI Ya Yi Taronsa Na 2026By CGTN HausaKwamitin ba da shawara kan hadin gwiwar kasa da kasa na dandalin shawarar Ziri Daya da Hanya Daya (BRI) ya gudanar da taronsa na shekara-shekara a yau Jumma’a, 17 ga wata a birnin Urumqi na yankin Xinjiang na kasar Sin.
Mahalarta taron sun tattauna kan yadda za a karfafa aiwatar da hadin gwiwar kasa da kasa na “BRI” yadda ya kamata, a cikin yanayin kasa da kasa mai sarkakiya kuma mara tabbas.
A cikin jawabinsa, Ma Zhaoxu, wanda ke jagorantar kwamitin ba da shawarar kuma mataimakin ministan harkokin wajen kasar Sin, ya bayyana cewa kasashen da ke cikin shawarar BRI sun dukufa wajen hadewa da juna da samun ci gaba na bai-daya, da gudanar da hadin gwiwar kasa da kasa mai amfanarwa ga dukkan bangarori, tare da aikewa da kyakkyawan sakon nuna hadin kai, da aiki cikin hadin gwiwa tare da samun nasara ga kowane bangare, inda hakan ke kawo kwanciyar hankali da kuzari mai kyau ga duniya, da kuma zama muhimmin ginshiki na samar da ci gaba mai tarihi.
Mahalarta taron sun yi amannar cewa hadin gwiwar shawarar BRI zai ci gaba da bayar da gudummawa mai daman gaske ga dorewar bunkasar tattalin arzikin duniya da kuma habaka hadin gwiwar tattalin arziki da cinikayyar kasa da kasa. (Mai fassara: Abdulrazaq Yahuza Jere)
