Hukumar Kwastam ta ƙasa (NCS), reshen shiyyar ‘Zone A’ da ke Ikeja a Jihar Legas, ta samu gagarumar nasara wajen damƙe kayayyakin fasa-ƙauri guda 220 waɗanda darajarsu ta kai Naira biliyan 3.24, a ranar Litinin, 10 ga watan Agusta, 2026.
Shugaban shiyyar, Kwanturola Gambo Aliyu, shi ya bayyana wannan nasara, inda ya tabbatar da cewa dakarun hukumar sun kuma yi nasarar ƙwato wasu maƙudan kuɗaɗen shiga na gwamnati da suka kai naira miliyan 728.98 a yayin gudanar da aikin.
Daga cikin kayan da Kwanturola Aliyu ya gabatar, akwai buhunan shinkafar ƙasar waje guda 4,956, wanda ya yi daidai da lodin manyan motocin tirela takwas, da kuma tsofaffin motocin ƙasar waje guda 12 da aka shigo da su ba bisa ƙa’ida ba.
Bugu da ƙari, dakarun sun ƙwace haramtattun ƙwayoyi da suka haɗa da tabar wiwi mai nauyin kilogiram 1,439.9, da ƙwayoyin Tramadol guda 240,000, da hauren giwa, da lita 24,100 na man fetur, da man gyada na ƙasar waje, da tsofaffin tayoyi, da kuma tsofaffin tufafi (gwanjo).
Kwanturolan ya yi gargaɗi mai tsauri ga ƴan fasa-ƙauri da masu shigo da kayayyaki ta haramtacciyar hanya, inda ya jaddada cewa reshan hukumar da ke Ikeja, za ci gaba da amfani da bayanan sirri domin farautar masu yi wa tattalin arzikin ƙasa da lafiyar al’umma zagon ƙasa, ba tare da sassauci ba.
