Kasar Sin ta karfafa fafutukar da take yi wajen lashe lambobin yabo a rana ta 14 ta gasar wasannin Olympics ta lokacin hunturu ta Milan-Cortina, yayin da Wang Xindi ya lashe zinare, kuma abokin wasansa Li Tianma ya samu tagulla a gasar zamiyar kankara da tsalle tare da jujjuyawa na maza, a jiya Jumma’a.
Sakamakon da suka samu ya daga darajar kasar Sin zuwa mallakar lambobin zinare hudu da azurfa uku da tagulla biyar.
Har ila yau, nasarar da Wang ya samu wani karin tagomashi ne na musamman a cikin iyalinsa. Kwanaki biyu bayan da matarsa Xu Mengtao ta kare kambunta a wasan zamiyar kankara da tsalle tare da jujjuyawa a bangaren mata, sai ga shi ya bi sahu shi ma da samun zinari na kansa, wanda hakan ya sanya su zama daya daga cikin ma’auratan da ba kasafai ake samu ba, inda kowannensu ya samu lambar zinare guda daya a gasar wasannin lokacin hunturu. (Abdulrazaq Yahuza Jere)
