Manama, Bahrain — Ɗalibar digirin-digirgir (PhD) ‘yar Nijeriya daga Kano, Maimuna Umar Zarewa, ta lashe babbar kyautar duniya ta Carbon Neutrality Cup, bayan ta ƙirƙiro wata na’ura mai amfani da ƙirƙirarriyar basira (AI) domin gano lalacewar ƙarfe (corrosion/tsatsa) da kare muhimman kayayyakin more rayuwa na man fetur da makamashi.
An shirya gasar ne ta hannun Gulf Petrochemicals and Chemicals Association (GPCA) a otel ɗin Sheraton da ke Manama, inda mahalarta daga ƙasashen yankin Hadaddiyar Daular Larabawa da suka hada da Qatar da Kuwait da Bahrain da Oman da kuma Saudiyya suka gabatar da sabbin dabaru kan dorewar muhalli da bunƙasar masana’antu.
- Waiwaye Adon Tafiya : Tasirin Sin A Kan Afirka Ta Fannin Fasahar AI
- Majalisar ECOWAS Ta Shirya Fara Amfani Da Fasahar AI Don Inganta Ayyukan Dokoki
Zarewa, wadda ke karatun digirinta na uku a Jami’ar King Fahd University of Petroleum and Minerals (KFUPM) da ke Saudiyya, ta ƙera wata na’ura mai sarrafa kanta wadda ta haɗa shirya samfur (sample preparation), gano sinadarai, tsarin mutum-mutumin inji (robotics) da kuma nazarin bayanai ta hanyar basirar wucin gadi (AI) a cikin tsari guda.
Sabuwar na’urarta ta bambanta da tsofaffin hanyoyin gano tsatsa (corrosion) da kan buƙaci na’urori da dama da kuma aiki da hannu. Ita kuwa, ta yi amfani da sinadari mai haske (fluorescence sensor) da aka samar daga tarkacen man fetur, wanda ke ba da damar gano lalacewa tun da wuri, cikin sauri, tare da rage kuɗaɗen aiki da dogaro da ma’aikata.
Ta hanyar mayar da tarkacen man fetur zuwa sinadari mai amfani, wannan ƙirƙire-ƙirƙire ya dace da manufar tattalin arziki mai zagaye (circular economy), tare da tallafa wa kare muhalli da rage gurɓacewar yanayi.
Bincike ya kuma nuna cewa sinadarin na da ikon hana tsatsa. A sakamakon haka, Zarewa na haɓaka sabon samfurin na’urar da zai ƙunshi tankin sinadarin kariya, wanda zai riƙa fesawa kai tsaye idan an gano alamun lalacewa, lamarin da zai sauya ta daga na’urar gano matsala kawai zuwa na’urar gano matsala tare da magance ta kai tsaye.
Masana sun ce asarar da tsatsa ke janyo wa masana’antar mai da iskar gas a duniya na kai biliyoyin daloli a kowace shekara. Sabuwar fasahar Zarewa na da damar taka muhimmiyar rawa wajen rage waɗannan asarori da ƙarfafa tsaron kayayyakin makamashi.
Nasararta ta ƙara haskaka rawar da matasan Nijeriya ke takawa a fannin binciken kimiyya na duniya, tare da nuna yadda sabbin dabaru ke taimakawa wajen tinkarar ƙalubalen muhalli da makamashi.
