Firaministan kasar Sin Li Qiang ya gana a jiya Talata da shugaban bankin duniya Ajay Banga da darektar asusun ba da lamuni na duniya IMF Kristalina Georgieva da sakatariyar MDD mai kula da harkokin ciniki da ci gaba Rebeca Grynspan, wadanda ke halartar taron koli na tattaunawa kan tattalin arzikin kasa da kasa tsakanin Sin da kungiyoyin tattalin arziki 10 na duniya da ake kira “1+10.”
Li Qiang ya bayyana cewa, tattalin arzikin Sin na ci gaba da tafiya cikin kwanciyar hankali ba tare da tangarda ba, kuma yana ci gaba da ba da karfinsa wajen samar da tabbaci da kwanciyar hankali ga tattalin arzikin duniya. Ya ce a cikin shirin raya kasar Sin na shekaru biyar-biyar karo na 15, tattalin arzikin Sin zai ci gaba da inganta. Yana mai cewa, Sin tana ci gaba da bude manyan kasuwanninta ga duniya, kuma tana gabatar da damammakin ci gaba tare da mabambantan kasashe, kuma za ta warware rikice-rikicen ciniki ta hanyar karfafa tattaunawa, ta yadda za a kara inganta moriyar juna.
Li Qiang ya kara da cewa, Sin na goyon bayan tsarin kasa da kasa bisa tushen MDD, kuma tana tallafawa ayyukan kungiyoyin raya tattalin arziki na kasa da kasa. Haka kuma tana son taimakawa mabambantan bangarori su bi ingantaccen tsarin kasa da kasa na gaskiya, da inganta daidaiton tsarin cudanyar mabambantan bangarori a duniya, da kuma ci gaban tattalin arzikin duniya mai gamsar da kowa.
A nasu bangare, Ajay Banga, Kristalina Georgieva, da Rebeca Grynspan sun ce, shirin raya kasar Sin na shekaru biyar-biyar karo na 15 zai baiwa tattalin arzikin duniya tabbaci da karfi masu inganci. Bangarori daban-daban na fatan ci gaba da bin tsarin kasa da kasa tare da Sin, don kiyaye tsarin cudanyar mabambantan bangarori a duniya da iko da kimar MDD, da kuma inganta tsarin jagorantar harkokin duniya. (Amina Xu)
