Majalisar Dattawan Nijeriya ta amince da ƙudirin dokar da ke neman soke hukunta mutanen da suka yi ƙoƙarin kashe kansu, inda ta karanta ƙudirin a karo na biyu, duk da adawar Shugaban Majalisar Dattawa, Godswill Akpabio.
Sanata Asuquo Ekpenyong ne ya gabatar da ƙudirin, wanda ke neman a riƙa ɗaukar ƙoƙarin kashe kai a matsayin matsalar lafiyar ƙwaƙwalwa da ke buƙatar kulawar likitoci maimakon zartar da hukunci.
A yayin muhawarar da aka yi ranar Talata, sanatoci da dama sun goyi bayan ƙudirin, inda suka ce ɗauri a gidan gyaran hali na iya hana mutane neman taimako tare da ƙara tsananta ƙyamar masu fama da matsalolin lafiyar ƙwaƙwalwa.
Sai dai Akpabio ya dage cewa ya kamata a ci gaba da ɗaure mutanen da suka yi ƙoƙarin kashe kansu.
Ya yi gargaɗin cewa soke hukuncin na iya ƙarfafa irin wannan aiki.
An tura ƙudirin ga kwamitocin Majalisar Dattawa da ke kula da harkokin lafiya, shari’a da haƙƙin ɗan Adam domin ci gaba da nazari.
A ƙarƙashin dokokin Nijeriya na yanzu, mutumin da ya yi ƙoƙarin kashe kansa na iya fuskantar hukuncin ɗaurin shekara ɗaya, tara ko duka biyun, gwargwadon dokar da ta shafe shi.
Ƙudirin na kuma neman daidaita waɗannan dokoki da Dokar Lafiyar Ƙwaƙwalwa ta Ƙasa, wadda ta amince cewa ƙoƙarin kashe kai matsala ce ta gaggawa da ke buƙatar kulawar likitoci.
