Tsohon mataimakin shugaban ƙasa, Atiku Abubakar, ya buƙaci ’yan Nijeriya su da karɓi katin zaɓensu gabanin zaɓen 2027, yana mai cewa karɓar katin hanya ce ta kawo sauyi cikin lumana.
Atiku, wanda shi ne ɗan takarar shugaban ƙasa na jam’iyyar ADC, ya soki gwamnatin Shugaba Bola Tinubu kan tsadar rayuwa da rashin tsaro.
Ya yi alƙawarin rage tsadar rayuwa da inganta tsaro idan aka zaɓe shi a matsayin shugaban ƙasa.
A wani bidiyo da ya wallafa a shafinsa na Facebook a ranar Laraba, Atiku ya ce magidanta da dama na fama da wahalar samun kuɗin sayan kayan abinci, biyan kuɗin sufuri da haya, da kuma sayen magunguna.
Ya kuma ce mutane da dama na rayuwa cikin fargabar yin garkuwa da su da hare-hare.
Ya buƙaci masu rajistar zaɓe su karɓi katinsu tare da amfani da shi wajen zaɓen sauyin da suke so.
Atiku ya ce, “Bola ya tsawwala rayuwa. Zan yi aiki don sauƙaƙa rayuwa da kuma tsaron kowane ɗan Nijeriya.”
A wani labari makamancin haka, Hukumar Zaɓe Mai Zaman Kanta ta Ƙasa (INEC) ta sanar da cewa katunan zaɓe na waɗanda suka yi rajista a shekarar 2025 da kuma waɗanda suka yi rajista a shekarun baya sun kammala.
INEC ta ce za a ci gaba da raba katunan a cibiyoyin rajista daga ranar 9 zuwa 15 ga watan Oktoba, 2026, sannan a mayar da aikin zuwa ofisoshin ƙananan hukumomi daga ranar 16 ga watan Oktoba.
Lokacin karɓar katunan zai fara daga ƙarfe 9 na safe zuwa 3 na rana.
