Daga ranar 17 zuwa 20 ga watan, an gudanar da babban taron manyan jami’ai na duniya kan tafiyar da sha’anin fasahar AI na 2026 a birnin Shanghai. Shugaban kasar Sin Xi Jinping ya halarci bikin bude taron jiya Jumma’a kuma ya gabatar da jawabi mai muhimmanci, inda ya gabatar da muhimman shawarwari guda hudu kan gina tsarin tafiyar da fasahar AI na duniya mai adalci, wadanda suka yi cikakken bayani kan batutuwan da ci gaban AI ya bullo da su, kuma suka jawo hankula daga mahalarta bikin da kuma al’ummar kasa da kasa.
Kasashen duniya sun yi imanin cewa, ra’ayoyin Sin kamar inganta fasahohin AI masu amfanar da mutane, hada kai don kawo alheri ga kowa da kowa, da kuma tsaro da aminci, dukkansu sun nuna kokarin sauke nauyinta a matsayin wata babbar kasa. Ban da haka kuma, kafa kungiyar hadin gwiwa ta AI ta duniya da kuma fitar da “Shirin Ayyuka Kan Hadin Gwiwa da Ci Gaban Fasahar AI”, wadanda sakamako ne da aka samu a gun taron, sun nuna matsayar da mahalarta suka cimma kan tafiyar da sha’anin fasahar AI a duniya.
A cikin shekaru biyar masu zuwa, kasar Sin za ta samar da damarmaki guda 5,000 na ba da horo a fannoni daban-daban da suka shafi fasahar AI ga kasashe masu tasowa, da kafa cibiyoyin hadin gwiwar aikace-aikacen fasahar AI na duniya ga kungiyoyin kasashe na ASEAN, LAS, AU, CELAC, SCO, da kuma BRICS, da kuma habaka amfani da manhajar gargadin gaggawa kan yanayi ta fasahar zamani ta “Mazu” a kasashe 30. Wadannan manyan shirye-shirye za su ba da damar inganta fasahar zamani ga kasashe da yawa.(Safiyah Ma)
