Omar M. Yaghi, wanda ya lashe kyautar Nobel a fannin Sinadarai, ya halarci bikin bude taron manyan jami’ai na duniya kan tafiyar da sha’anin fasahar AI na 2026 da aka gudanar a Shanghai jiya Jumm’a, kuma ya saurari jawabin shugaban kasar Sin Xi Jinping, inda ya yi nuni da cewa, jawabin ya yi matukar ba da fa’ida da kuma kwarin gwiwa.
A wata hira da wakiliyar babban rukunin gidajen rediyo da talabijin na Sin wato CMG, Omar M. Yaghi ya ce abin da ya fi burge shi a jawabin shugaba Xi shi ne, ya dauki fasahar AI da kuma ci gabanta a matsayin wata sana’a ta duniya dake amfanar da duniya, a maimakon wata sana’a ta wata kasa ita kadai. Game da wannan, Omar ya ce ya yarda da tsarin raba dukkan bayanai da fasaha a fili, wanda hakan yana da matukar amfani ga masu yin nazari da yawa, ciki har da shi kansa.
Da yake tsokaci game da ci gaban kimiyya da fasaha na kasar Sin, Omar ya ce yawan dalibai masu kammala karatun jami’a da kasar Sin take yayewa a fannonin kimiyya, fasaha, injiniyanci, da lissafi a kowace shekara, ya fi na kowace kasa a duniya. Saboda haka, kasar Sin ta samu ci gaba cikin sauri a kusan dukkan fannoni na kimiyya da fasaha, kuma tana sahun gaba a duniya a fannoni da dama na fasahar kirkire-kirkire.(Safiyah Ma)
