Shugaban Hukumar Hana Sha da Fataucin Miyagun Ƙwayoyi ta Ƙasa (NDLEA), Mohamed Marwa, ya ƙaddamar da wani shiri na tarihi na horar da jami’an hukumar kan sarrafa makamai a Kwalejin NDLEA da ke Jos, Jihar Filato, lamarin da ya nuna fara amfani da bindigogin AK-47 da manyan bindigogin hannu na zamani a ayyukan hukumar karo na farko cikin shekaru 36 da kafuwarta.
Da yake jawabi yayin ƙaddamar da kwas na musamman na horar da masu horaswa kan amfani da bindigar AK-47 nau’in Type 56-1 da kuma bindigogin HS-9/CF98A a ranar Litinin, Marwa ya bayyana matakin a matsayin wani muhimmin ci gaba da ya zama dole sakamakon yadda ƙungiyoyin masu safarar miyagun ƙwayoyi ke ƙara amfani da muggan makamai wurin gudanar da ayyukan su.
Marwa, wanda shugaban ma’aikatansa, Murtala Aminu, ya wakilta, ya ce sauyin yanayin yaƙin da ake yi da miyagun ƙwayoyi ya sa ya zama wajibi a tanadi kayan aiki da horo ga jami’an hukumar domin kare kansu da kuma al’umma.
Shugaban NDLEA ya jaddada cewa shirin ba wai kawai na gabatar da bindigogi ga jami’an hukumar ba ne, illa dai wani mataki ne na kare rayuka da kuma ƙarfafa ingancin ayyukan hukumar wajen yaƙi da fataucin miyagun ƙwayoyi.
