Masanin kimiyya na kasar Sin, Pan Jianwei, ya zama dan kasar Sin na farko da ya lashe kyautar kasa da kasa ta UNESCO-Russia Mendeleev a fannin tushen ilimin kimiyya saboda gudummawar da ya bayar wajen samar da manyan hanyoyin kiyaye sadarwar abubuwa masu kankanta sosai ko kwantum (quantum) da kuma amfani da fasahar kwantum wajen yin lissafi da sarrafa bayani.An gudanar da bikin girmama shi ne a hedikwatar UNESCO da ke birnin Paris.
A cewar UNESCO, Pan, kwararre ne a duniya a fannin nazarin kimiyyar haske ta kwantum, da sadarwarta da kuma yadda take sarrafa bayanai, a Jami’ar Kimiyya da Fasaha ta Sin. Tawagarsa ce ta kirkiro da tauraron dan adam na Micius, wanda hakan ya ba da damar samun hanyar rarraba makullan sirri na kwantum da kuma watsa bayanai a bangaren a tsawon dubban kilomita, kuma ya fito da muhimmancin yin lissafi da sarrafa bayanai ta kwantum, wanda hakan ne ya ba da damar samun nasarar bullo da hanyar sadarwa ta kwantum ta duniya daga bangaren ra’i kawai zuwa ganinta a zahiri. (Mai fassara: Abdulrazaq Yahuza Jere)
