Yau Jumma’a, mataimakin shugaban Sin, Han Zheng ya halarci bikin bude taron dandalin tattauna zaman lafiya na duniya karo na 14 a jami’ar Tsinghua dake birnin Beijing tare da ba da jawabi.
Han Zheng ya bayyana cewa, duniya a halin yanzu tana fuskantar sauye-sauye cikin sauri, yanayin kasa da kasa na cike da sarkakiya da tashe-tashen hankula, kuma a kan samu rikice-rikicen siyasa a shiyya-shiyya. Ban da haka kuma, hadura da kalubaloli daban-daban da kuma gibin shugabanci sun fito sosai. Ya ce, shawarar inganta shugabancin duniya da shugaba Xi Jinping ya fitar, ta inganta gina tsarin shugabanci mai adalci a duniya, kuma ta sanya kwanciyar hankali da kuzari ga kasa da kasa.
Bugu da kari, a gun taron, Han Zheng ya gabatar da shawarwari guda hudu, na farko shi ne a tsaya tsayin daka kan kare iko da matsayin MDD. Na biyu shi ne zurfafawa da fadada tsarin hadin gwiwa da suka shafi bangarori daban-daban. Na uku shi ne inganta tsarin shugabancin harkokin tattalin arziki na duniya. Na hudu, shi ne karfafa shugabanci a fannoni masu tasowa kamar fasahar AI. (Safiyah Ma)
