Wata mata mai suna Maimunatu Sulaiman ‘yar shekara 21 a duniya da ke zaune a unguwar Kofar Dumi a kwaryar Bauchi ta kashe mijinta, Aliyu Mohammad sakamakon rashin jituwar da ta barke a tsakaninsu.
Majiya daga yankin ta bayyana cewa an samu rashin jituwa ne a tsakanin miji da matar ne sakamakon yunkurin da mijin ya yi na kara aure.
- Ina Son Kara Aure, Ko Me Yake Kawo Matsaloli Tsakanin Kishiyoyi Da Yadda Za A Magance?
- Batun Sake Sulhu Da ‘Yan Bindiga A Sikeli
Kazalika, an ruwaito cewar matar ta daddaba wa mijin wuka ne a kirjinsa wanda hakan ya yi sanadin ajalinsa.
Lamarin dai ya faru ne a ranar 5 ga watan Yulin 2023 a unguwar Kofar Dumi.
Rundunar ‘yansandan Jihar, ta ce kawo yanzu sun cafke matar da ake zargi da kisan kan.
Sanarwar da kakakin ‘yansandan jihar, ASP Aminu Gimba Ahmed ya fitar a ranar Juma’a ta ce, “A ranar 5 ga watan Yuli 2023 jami’an caji ofis din ‘yansanda da ke Township, Bauchi sun kama wata Maimunatu Sulaiman kan zargin aikata kisan kai.
“Lokacin da jami’an suka samu rahoton faruwar lamarin, sun garzaya zuwa inda lamarin ya faru tare da daukar wanda lamarin ya ratsu da shi da ita kanta wadda ake zargi zuwa asibitin koyarwa na Abubakar Tafawa Balewa da ke Bauchi.
“Amma likitoci sun tabbatar da mutuwar mijin sakamakon rauni da ya samu a kirjinsa, yayin da ita kuma wadda ake zargin ta samu wasu raunuka a cikinta.”
Binciken ‘yansanda ya nuna cewa wadda ake zargin ta soki mijinta a kirjinsa sakamakon rashin jituwar da ta barke a tsakaninsu.
Wadda ake zargin ta amsa laifin da ake tuhumarta da shi.
Kwamishinan ‘yansandan jihar, CP Auwal Musa Mohammad, ya umarci mayar da binciken lamarin zuwa sashen kula da manyan laifuka (SCID) don zurfafa bincike.
Ya ce za a gurfanar da wadda ake zargin da zarar an kammala bincike.
