Ministan harkokin wajen kasar Sin Wang Yi ya bayyana a ranar Asabar 14 ga wata cewa, tarihi yana samun ci gaba ne ta hanyar sauye-sauye da jujjuyawar lamurra, kuma akwai kyakkyawan fata a dangantakar Sin da Amurka.
Wang, wanda har ila yau mamba ne a ofishin siyasa na kwamitin tsakiya na jam’iyyar kwaminis ta kasar Sin, ya bayyana hakan ne yayin da yake amsa tambayoyi kan alakar Sin da Amurka bayan gabatar da jawabi a zaman taron da aka yi mai lakabin “Sin a duniya” a babban taron tsaro na Munich.
Wang ya ce, yadda kasashen Sin da Amurka, a matsayinsu na manyan kasashe biyu na duniya ke yi mu’amala da juna, yana shafar babbar alkiblar da yanayin kasa da kasa ke sa gaba.
A cewar Wang, shugaba Xi Jinping ya takaita abubuwan da aka fuskanta da darussan da ke cikin mu’amalar Sin da Amurka ta gomman shekaru, inda ya ba da shawarar cewa, ya kamata su mutunta juna, da zama tare cikin lumana, da yin hadin gwiwar samun moriya ga ko wane bangare, kuma ta hanyar yin shawarwari da tuntuba, su hada karfi da karfe wajen lalubo hanyar da ta dace ga manyan kasashen biyu na duniya su yi tafiya kafada-da-kafada a doron kasa.
Wang ya ce, kasar Sin za ta ci gaba da bin wannan mataki na gama-gari, bisa yadda yake kare moriyar jama’ar kasashen biyu, da muradun al’ummomin duniya. Sai dai kuma ya jaddada cewa, ko za a iya cimma burin hakan, abin ya dogara ne da halin Amurka. (Abdulrazaq Yahuza Jere)
