A ranar Lahadi, 5 ga watan Yuli, 2026, wani mummunan hatsarin mota da ya auku a kan babban titin Ilorin zuwa Jebba, daidai garin Olooru da ke ƙarƙashin Ƙaramar Hukumar Moro a Jihar Kwara, ya yi sanadiyyar mutuwar mutum goma sha biyar (15) farat ɗaya, yayin da wasu mutum goma sha bakwai (17) suka sami raunuka masu tsanani.
Hatsarin ya auku ne da misalin ƙarfe 5:00 na safe, inda ya raba wata motar tirela mai lamba LND 35 XW wadda ta ɗauko fasinjoji da kaya (flour) ta fito daga shiyyar Arewa ta doshi birnin Legas.
Kwamandan Hukumar Kare Hadurra ta Ƙasa (FRSC) reshen Jihar Kwara, Stephen Dawulung, ya tabbatar da faruwar lamarin, inda ya bayyana cewa hatsarin ya faru ne sakamakon gudun wuce sa’a da rashin kula da direban ya yi sa’ilin da yake ƙoƙarin shan wata kwana, wanda hakan ya sa motar ta kwace masa ta kife.
A cewar Stephen Dawulung, jimullar mutum talatin da biyu (32) ne ke cikin tirelar a lokacin da abin ya faru. Jami’an ceto na FRSC tare da taimakon mazauna yankin sun garzaya wurin da wurwuri inda suka kwashe mutanen da suka raunata zuwa Babban Asibitin Ilorin (University of Ilorin Teaching Hospital) da kuma Asibitin Katolika na Oluyoro da ke Olooru domin ba su kulawar gaggawa. Haka zalika, an ajiye gawarwakin mutum 15 da suka rasu a ɗakin adana gawarwaki na babban asibitin da ke Ilorin.
Hukumar FRSC ta yi Allah-wadai da yadda direbobi ke ci gaba da amfani da motocin dakon kaya wajen ɗaukar fasinjoji, lamarin da ta bayyana da cewa yana da haɗari ga rayuwar ‘yan ƙasa. Dawulung ya yi kira ga ƙungiyoyin motoci da masu ababen hawa da su guji gudun ganganci, da tuki bayan gajiya, da kuma lodin da ya saɓa wa ƙa’ida domin kare aukuwar irin wannan rashi na rayuka a kan manyan hanyoyin ƙasar nan.
