A yau Lahadi 5 ga watan nan na Yuli, dakin nune-nunen shaidun dake tabbatar da ta’asar aikata laifukan yaki, da tawagar dakarun Japan mai lamba 731 ta tafka, ya fitar da wasu karin bayanai na “bayanan tarihin daidaikun mutane” daga tawaga mai lamba 516 ta dakarun sojin Japan.
Wannan muhimmin kundin bayanai na ayyukan soji, wanda Sin ta samu daga Japan, na kunshe da tarin shaidun ketare da aka tattara cikin shekarun baya-bayan nan. Kazalika, ya zamo sabon bangare na sahihan shaidu da ba za a iya musanta su ba, wanda ya fallasa laifukan yaki da dakarun mamaya na kasar Japan suka aikata a kasar Sin.
Kwararru sun amince, cewa bayanan na “bayanan tarihin daidaikun mutane”, sun tabbatar da yadda tawagar dakarun na Japan mai lamba 516, ta sha yin cudanya tare da cibiyar binciken kimiyya ta sojojin kasar ta Japan, da makarantar aikin likita ta sojojin kasar da sauran wasu karin cibiyoyin.
Har ila yau, hakan ya kara tabbatar da cewa, laifukan yaki ta amfani da sinadarai masu guba da sojojin Japan suka aikata, laifi ne mai alaka da kasar, wanda kuma gwamnati take da hannu wajen kitsawa. (Saminu Alhassan)
