Shugaban Kwamitin Majalisar Wakilai kan Al’amuran Sojin Ruwa, Yusuf Adamu Gagdi, ya bayyana cewa duk wani ɗan bindiga ko ɗan ta’adda da aka kama da laifin kisan mutane ba shi da hurumin samun afuwa ko shirin gyaran hali (rehabilitation), face dai hukuncin kisa ta hanyar rataya.
Yusuf Gagdi, wanda ke wakiltar mazaɓar Pankshin/Kanke/Kanam daga Jihar Plateau a majalisar tarayya, ya bayyana hakan ne yayin da yake jawabi ga manema labarai kan yadda za a magance matsalar rashin tsaro da ke addabar shiyyar Arewa da sauran sassan ƙasar nan. Ɗan majalisar ya soki tsarin da gwamnati ke amfani da shi na sauya wa tubabbun ‘yan ta’adda halayya (irin su tsoffin mambobin Boko Haram ko ‘yan bindiga), inda ya bayyana cewa wannan tsari yana ƙara wa miyagu karfin gwiwar ci gaba da kisan jama’a ne ba tare da tsoron komai ba.
Gagdi ya jaddada cewa dokar ƙasa ta tanadi hukuncin kisa ga duk wanda aka samu da laifin kisan kai, saboda haka babu adalci a ce an kashe manoma ko ‘yan ƙasa maras laifi sannan a kama maharin a riƙa ciyar da shi da kuɗin haraji da sunan canza masa halayya. Ya yi kira da babbar murya ga Gwamnatin Tarayya da hukumomin shari’a da su gaggauta aiwatar da hukuncin kisa na gaggawa ga duk wani mai garkuwa da mutane ko ɗan bindiga da aka kama domin ya zama izina ga sauran masu shirin tafka irin wannan aika-aika.
Wannan tsokaci na Yusuf Gagdi ya zo ne a daidai lokacin da al’ummomin Jihar Filato da sauran jihohin makwabta ke ci gaba da fuskantar hare-haren dare na ‘yan bindiga da masu garkuwa da mutane. Jam’ian majalisar da masana tsaro da dama sun daɗe suna muhawara kan dacewa ko rashin dacewar shirin afuwa ga ‘yan ta’adda, inda yawancin ‘yan ƙasa ke goyon bayan matakin Gagdi na cewa a hukunta kowa daidai da laifin da ya aikata domin dawo da amincin doka a ƙasar baki ɗaya.
