“Becoming Chinese” wato “Zama Basine” wani abun barkwanci ne dake yawo a kafafen sada zamunta, inda ya zama wata dama ta fahimtar kasar Sin yayin Bikin Bazara na Sabuwar Shekarar Gargajiya ta Kasar Sin. wani nazari da kafar CGTN ta gudanar ta kafar intanet ya nuna cewa, kaso 80.8 na masu bayar da amsa sun yi imanin cewa, al’adun kasar Sin sun tashi daga al’adu na bangare guda zuwa wanda suka samu karbuwa a sassa daban daban, inda mutane da dama ke bayyana muradin zama Sinawa a lokacin bikin bazara.
Yayin sabuwar shekarar ta bana, adadin bakin da suka tanadi tikitin zuwa kasar Sin ya karu da sama da sau 4 bisa mizanin shekarar-shekara. Masu tanadin tikiti a Australia da Canada da Burtaniya sun karu sosai, yayin da adadin masu yawon bude ido daga Koriya ta Kudu ya karu da kaso 95 idan aka kwatanta da bara. Kasashen Turai kamar Spaniya da Netherlands da Italiya su ma adadinsu ya rubanya…
Nazarin ya gano cewa, kaso 86.7 na masu bayar da amsa na sa ran zuwa kasar Sin domin bikin sabuwar shekarar. Wasu 95.1 kuma sun bayyana matukar sha’awarsu ta kara saninsu game da sabuwar shekarar gargajiya ta Sin. Wasu 78.7 na ganin bikin a matsayin wata muhimmiyar kafa ta ganin al’adu da zamantakewar Sinawa. Abun da ya fara a kafafen sadarwa, ya bunkasa zuwa shiga bukuwan murnar sabuwar shekarar gargajiya ta Sinawa a zahiri.
Shekaru biyu da suka gabata ne hukumar UNESCO ta sanya bikin bazara na sabuwar shekarar gargajiya ta Sinawa cikin jerin al’adun gargajiya da dan adam ya gada, inda ya zama wata al’ada mai daraja ga kowa. A cewar nazarin, kaso 95 na masu bayar da amsa sun yi imanin cewa, sanya bikin cikin jerin UNESCO ya nuna cewa al’adun Sinawa na kara samun karbuwa da yabo a fadin duniya. Haka kuma, wasu kaso 91.7 sun amince cewa, ruhin hadin kai da ‘yan uwantaka da zaman lafiya da lumana dake tattare cikin bikin ya dace sosai da ainihin dabi’ar wayewar kan dan adam.
Nazarin ya gudana ne a dandamalin CGTN na harsunan Ingilishi da Spaniyanci da Larabci da Rashanci, inda ya ja hankalin mutane 5,154 na kasa da kasa da suka bayyana ra’ayoyinsu cikin sa’o’i 24. (FMM)
