Hukumar hana sha da fataucin miyagun ƙwayoyi ta ƙasa, NDLEA, ta cafke mutane uku masu nakasa bisa zargin safarar miyagun ƙwayoyi a jihohin Anambra da Kwara, yayin da ta kuma gano haramtattun ƙwayoyi da darajarsu ta haura naira biliyan 5.8 a wani sumamen da aka kai Lagos.
A cewar sanarwar da daraktan yaɗa labarai da wayar da kai na NDLEA, Femi Babafemi ya fitar a Abuja ranar Lahadi, jami’an hukumar sun kama wani dattijo mai shekaru 60 mai suna Romanus Nwabara a cikin dajin Akpaka da ke Onitsha bayan samun bayanan sirri, inda aka same shi da gram 250 na tabar wiwi da aka rarraba cikin ƙananan ledoji. Haka kuma a yankin Ogbunike na jihar Anambra, jami’ai sun kama wani mai nakasa mai suna Amos Kenneth ɗauke da ƙwayoyin Tramadol, da Diazepam, da Exol 5 da kuma tabar wiwi.
A jihar Kwara kuwa, jami’an NDLEA sun kama Usman Salisu yayin sintiri a Bode Saadu bayan an gano kilo 6.3 na tabar wiwi a cikin jakar makaranta da yake ɗauke da ita a cikin motar haya. A wani samame na musamman da aka kai wani gida a Lekki Phase 1 na jihar Lagos, jami’an hukumar sun kwato fakiti 4,000 na wata nau’in tabar wiwi mai ƙarfi da ake kira “Loud” masu nauyin kilo 2,326, waɗanda aka kiyasta darajarsu ta kai sama da naira biliyan 5.8.
Hukumar ta kuma kama wasu mutane uku a kan titin Okene zuwa Lokoja a jihar Kogi bayan gano buhuna 76 na tabar wiwi masu nauyin kilo 766 a cikin wata motar haya da ke kan hanyarta zuwa Abuja. A Lagos ma, jami’ai sun kai samame wani wurin sarrafa “skuchies” a Ijora Badia inda suka kama mutane biyu ana haɗa tabar wiwi da sauran haramtattun sinadarai.
