Hukumar Hana Sha da Fataucin Miyagun Ƙwayoyi ta Nijeriya (NDLEA) a Jihar Kano, ta ce ta kama mutane 1,860 tare da ƙwace kilogiram 5,409.814 na miyagun ƙwayoyi tsakanin watan Janairu da Satumban shekarar 2026.
Hukumar ta kuma samu nasara a hukuncin shari’o’i 89, ta shigar da sabbin ƙararraki 126 a kotu, yayin da wasu shari’o’i 135 ke ci gaba da wakana a gaban Babbar Kotun Tarayya.
Jami’in hulɗa da manema labarai na hukumar a Kano, Sadiq Muhammad Maigatari ne, ya bayyana hakan a cikin wata sanarwa da ya fitar ranar Talata.
Ya ce mata 92 na cikin mutanen da aka kama.
Miyagun ƙwayoyin da aka ƙwace sun haɗa da tabar wiwi, hodar iblis, methamphetamine da sauran ƙwayoyi masu haɗari.
Hukumar ta kuma gudanar da ayyukan ba da shawarwari da kula da masu shaye-shaye kusan 1,700, tare da gabatar da shirye-shiryen wayar da kai guda 420 a makarantu da cikin al’umma.
NDLEA ta ce aikin Operation Restore Order ya kai ga rufe wuraren da ake zargin ana sayar da miyagun ƙwayoyi kusan 35 tare da kama mutane sama da 300.
A wani aikin da jami’anta suka gudanar mai suna Operation Sharar Mafaka, jami’an hukumar sun gano ramuka da koguna a ƙarƙashin ƙasa a yankin Rimin Kebe da ke cikin birnin Kano, waɗanda a cewar hukumar masu safarar miyagun ƙwayoyi ne ke amfani da su wajen ayyukansu.
Kwamandan NDLEA na Jihar Kano, CN DY Lawal, ya yi kira ga al’umma da su riƙa bai wa hukumar sahihan bayanai kan masu safarar miyagun ƙwayoyi domin taimakawa wajen yaƙi da fataucinsu da shaye-shayensu.
