Hukumar Hana Sha da Fataucin Miyagun Ƙwayoyi ta Ƙasa (NDLEA), reshen rundunar ta Jihar Kano, ta lalata kilo 12,234.946 na miyagun ƙwayoyi iri-iri.
Hakan na ƙunshe ne cikin wata sanarwa da jami’in hulɗa da jama’a da wayar da kan jama’a na rundunar, Sadiq Maigatari, ya fitar, a ranar Litinin.
Sanarwar ta ce, “Hukumar NDLEA reshen Kano ta lalata a bainar jama’a kilo 12,233.946 na miyagun ƙwayoyi iri-iri, waɗanda aka kama tare da kwace su ta hanyar ayyukan bincike da tattara bayanan sirri da aka gudanar a sassa daban-daban na Jihar Kano da kuma a Filin Tashi da Saukar Jiragen Sama na Malam Aminu da ke Kano.”
Sanarwar ta ƙara da cewa an gudanar da aikin ne ƙarƙashin jagorancin Kwamanda, Dahiru Yahaya Lawal, inda ta bayyana hakan a matsayin wani babban ci gaba a yaƙin da hukumar ke yi da shaye-shaye da ta’ammuli da miyagun ƙwayoyi.
Ta ce matakin ya nuna ƙudirin NDLEA na kama miyagun ƙwayoyi, gudanar da bincike, gurfanar da masu hannu a gaban kotu, da kuma tabbatar da cewa an kawar da irin waɗannan abubuwa masu haɗari daga cikin al’umma baki ɗaya.
