Rundunar Hukumar Tsaro ta Sibil Difens, NSCDC reshen Jihar Yobe ta kama mutane biyar, ciki har da wata mata mai shekaru 42 mai suna Nancy Benedict, bisa zargin saye da sarrafa naman shanun da suka mutu domin sayarwa acikin abinci.
An kama mutanen ne a yankin ‘New Jerusalem’ da ke Damaturu, babban birnin jihar.
Jami’in hulda da jama’a na NSCDC a jihar, Bala Garba, ya ce rundunar ta samu bayanan sirri kan ayyukan matar, inda ta sanya mata ido a ɓoye na tsawon makonni biyu.
Ya ce jami’an rundunar sun gano matar tana sayen gawarwakin shanu biyu kan kudi N100,000, da zargin an yi niyyar sarrafa naman domin amfanin dan Adam.
NSCDC ta ce bincike zai gano asalin lamarin, ta yadda aka shirya sarrafa naman da kuma gano ko an riga an taɓa sayar wa mutane naman acikin abinci.
Lamarin ya jawo damuwa kan lafiyar jama’a, ganin cewa naman dabbobin da suka mutu ba tare da binciken likitan dabbobi ba na iya haifar da hadarin kamuwa da cututtuka idan aka sarrafa shi aka sayar da shi ga mutane.
