Shugaban ƙasa Bola Ahmed Tinubu, ba zai halarci babban taron Majalisar Ɗinkin Duniya karo na 81 (UNGA 81) da za a gudanar a birnin New York na Amurka ba.
Maimakon haka, ya umarci Mataimakin Shugaban Ƙasa, Kashim Shettima, da ya jagoranci tawagar Nijeriya zuwa taron, wanda muhimmin ɓangaren muhawararsa zai gudana daga 22 zuwa 28 ga Satumba, 2026.
Wannan sauyi ya zo ne duk da cewa a watan Yuli, Jakadan Nijeriya na dindindin a Majalisar Ɗinkin Duniya, Ambasada Jimoh Ibrahim, ya bayyana cewa Tinubu ya tabbatar masa da niyyarsa ta halartar taron da kansa.
An kuma saka sunan shugaban ƙasar cikin jerin shugabannin da aka tsara za su gabatar da jawabai a taron.
A sanarwar da Babban Mataimaki na Musamman ga Mataimakin Shugaban Ƙasa kan Yaɗa Labarai da Sadarwa, Stanley Nkwocha, ya fitar ranar Lahadi, 20 ga Satumba, 2026, ya ce Shettima zai gabatar da jawabin Nijeriya, tare da halartar manyan tarukan diflomasiyya da ganawa da shugabannin ƙasashe da ƙungiyoyin ƙasa da ƙasa.
Ana sa ran mataimakin shugaban ƙasar zai yi amfani da taron wajen bayyana matsayar Nijeriya kan batutuwan ci gaba, da tsaro, da sauyin yanayi, da tattalin arziƙi da haɗin gwiwar ƙasashe.
Haka kuma, zai halarci tarukan gefe da tattaunawar diflomasiyya da nufin ƙarfafa dangantakar Nijeriya da sauran ƙasashe.
Wannan shi ne karo na uku a jere da Shettima zai wakilci Tinubu a taron UNGA, bayan ya jagoranci tawagar Nijeriya a shekarun 2024 da 2025. Har yanzu ba a bayyana dalilin da ya sa Shugaba Tinubu ya fasa halartar taron da kansa ba, duk da tabbacin da ya bayar a baya.
