Tawagar Super Eagles ta Nijeriya za ta buga wasanninta biyu na farko na neman gurbin shiga gasar cin kofin nahiyar Afirka ta 2027 (AFCON) ba tare da fitaccen ɗan wasanta na gaba, Victor Osimhen, ba, sakamakon raunin tsoka da yake fama da shi. Nijeriya za ta kara da Madagascar da Guinea-Bissau a wasannin neman gurbin gasar da za a buga a watan Satumba na 2026.
Super Eagles ta tabbatar da cewa Osimhen ba zai samu damar buga wasannin biyu ba, bayan murmurewarsa daga raunin da ya samu ya ɗauki tsawon lokaci fiye da yadda aka yi tsammani. Ɗan wasan mai shekaru 27, wanda ke taka leda a ƙungiyar Galatasaray ta Turkiyya, ya samu raunin ne a wasan da ƙungiyarsa ta doke İstanbul Başakşehir da ci 3-2 a ranar 4 ga Satumba, 2026. Raunin ya kuma hana shi buga wasu wasannin Galatasaray, ciki har da na gasar Zakarun Turai da Sporting CP.
A baya, kocin Super Eagles, Éric Chelle, ya saka sunan Osimhen cikin ’yan wasa 24 da ya gayyata domin fafatawa a wasannin neman gurbin AFCON, bisa fatan zai murmure kafin fara wasannin. Sai dai bayan da ya kasa samun damar buga wa Galatasaray wasa da Trabzonspor a ranar 19 ga Satumba, an tabbatar da cewa har yanzu yana jinya kuma ba zai samu damar buga wa Nijeriya wasannin ba.
Nijeriya za ta karɓi baƙuncin Madagascar a filin wasa na Godswill Akpabio International Stadium da ke Uyo a ranar 25 ga Satumba, kafin ta je Bissau domin karawa da Guinea-Bissau a ranar 29 ga Satumba, 2026. Rashin Osimhen ya kawo sauyi a shirin Chelle, wanda yanzu zai dogara da sauran ƴan wasan gaba da ke cikin tawagarsa domin fara neman tikitin gasar AFCON ta 2027.
