Daniel Bwala, mai ba Shugaba Bola Tinubu shawara kan harkokin sadarwa, ya soki tsohon ɗan takarar shugaban ƙasa na jam’iyyar Labour Party, Peter Obi.
Da yake magana a shirin The Clarity Zone Podcast, Bwala ya kwatanta Peter Obi da ‘yan wasan ƙwallon ƙafar Firimiyar Ingila da ke sauya ƙungiya duk kakar wasa.
- Shirin Ceto Zamfara Na Samun Nasara, Yayin Da Gwamna Lawal Ke Duba Ayyuka A Shinkafi
- Za Mu Baza Ƙarin Jami’anmu A Faɗin Nijeriya Don Samar Da Tsaro – Sojoji
Ya ce Obi yana yawan sauya jam’iyyar siyasa.
Bwala ya bayyana Obi a matsayin mutum mai neman dama ta siyasa.
Ya ce magoya bayan Obi a kafafen sada zumunta suna yawan sukar mutane idan suka sauya jam’iyya, amma ba sa ganin laifi jagoransu, Peter Obi, kan yadda yake sauya jam’iyya.
A cewar Bwala, bayan zaɓen 2023, Obi ya rasa yawancin ‘yan siyasar da suke tare da shi.
Ya ce Obi ba shi da ‘yan majalisar wakilai ko sanatoci a Majalisar Ƙasa a halin yanzu.
Ya kuma ce gwamnan da Obi yake da shi ma ba ya tare da shi a yanzu.
Bwala ya ƙara da cewa yawancin ‘yan takarar da Obi ya riƙa tallafawa a faɗin ƙasar nan sun sha kaye a zaɓen da ya gabata.
Bwala ya yi tambaya kan ikirarin Obi na gina wata tafiya a siyasa.
Ya ce tafiya ta gaskiya na nufin canji na ainihi, amma daga baya mutane sun fahimci cewa Obi ba shi da niyyar mulkar Nijeriya yadda ya kamata.
A ƙarshe, Bwala ya ce Obi ya sauya jam’iyya daga APGA zuwa PDP, daga nan zuwa Labour Party, sannan yanzu ya koma jam’iyyar ADC.
Ya ce hakan ya nuna cewa Obi yana kama da ‘yan wasan ƙwallon ƙafa da ke sauya ƙungiya duk kakar wasa.
