Hukumar karɓar ƙorafe-ƙorafe da yaƙi da cin hanci ta Jihar Kano (PCACC) ta tsare shugabannin riƙo na ƙananan hukumomi uku bisa zargin almundahanar kwangilar ruwa da ya kai Naira miliyan 660. Abdulaziz Sulaiman na ƙaramar hukumar Kiru, da Basiru Abubakar na Bebeji, da Gambo Isa na Garko an zarge su da karkatar da kuɗaɗen gwamnati zuwa asusun ajiyarsu.
Binciken ya kai ga tsare wasu mutane 19, ciki har da manyan jami’ai da shugabannin sassa, bisa samun hannunsu wajen haramta canja kuɗaɗe da kuma cire manyan kuɗaɗe daga asusun gwamnati.
- An Kama Dan Uwan Kwankwaso Da Wasu 4 Kan Badakalar Magani A Kano
- Ba Mu Da Masaniya Kan Kwangilar Samar Da Magunguna – Gwamnatin Kano
Binciken ya bayyana cewa Musa Garba Kwankwaso, ɗan uwa ga Sanata Rabiu Musa Kwankwaso, ya shiga ciki ne ta hanyar kamfaninsa, Novomed Pharmaceuticals. An zargi Novomed da karɓar Naira miliyan 10 daga kowanne daga cikin ƙananan hukumomi 44 na Kano, a matsayin ɓangare na kwangilar samar da magungunan da ake zargi da ya kai Naira miliyan 440.
PCACC ta rufe sama da Naira miliyan 160 a asusun kamfanin kuma ana danganta wannan almundahana da wani kuɗi da ya kai Naira biliyan 1.1 da aka ware don ayyukan ruwa da lafiya a faɗin jihar.
Duk da cewa an bayar da belin shugabannin da aka tsare, har yanzu ba su cika sharuddan belin ba. Lauyan Musa Garba ya soki shigar da hukumomin yaƙi da cin hanci fiye da ɗaya a cikin lamarin, yana mai cewa hakan ya saɓa wa tsarin kundin tsarin mulki.
