A yau Laraba, kasar Sin ta harba taurarin dan’adam guda tara zuwa da’irorin da aka tsara hawansu a sararin samaniya daga yankin teku dake kusa da birnin Shanghai na gabashin kasar.
Cibiyar harba tauraron dan’adam ta Taiyuan ce ta gudanar da wannan aiki. Taurarin na dan’adam wadanda suka hada da sabon rukuni na taurarin Qianfan da ake iya ganin alamominsu a doron kasa da kuma wani tauraron dan’adam na gwajin fasahar sadarwa mai saurin aiki, watau (EUHT). An harba su ne da misalin karfe 6 na safe bisa agogon Beijing, a cikin rokar dakon kaya ta Gravity-1 Y3. Kana an bayyana cewa aikin ya samu cikakkiyar nasara dari bisa dari.
An bayar da rahoton cewa, wannan aiki ya kafa sabon tarihi dangane da dakon kaya masu nauyi zuwa sama da kuma harba rokoki zuwa daidai nisan da aka tsara daga doron kasa a bangaren fasahar kasar Sin ta harba roka sau daya daga teku.
Nauyin taurarin da aka harba ya zarce tan 3, yayin da nisan da’irar saman da aka kai su bai wuce kimanin kilomita 800 daga doron kasa ba. Wannan ya ba da tabbacin dacewar amfani da dabarar harba roka daga teku a bangaren dakon taurarin dan’adam masu matsakaicin nauyi da kuma masu nauyi sosai. (Abdulrazaq Yahuza Jere)
