Yayin da Ruwanda ta bayar da rahoton samun karuwar masu yawon bude ido daga kasar Sin, masu ruwa da tsaki a harkar yawon bude ido sun ce farfadowar yawon bude ido na Sinawa a kasashen waje na samar da sabbin damammaki ga kasuwannin cikin gidan kasashen, da shirye-shiryen kiyaye al’adu, da ayyukan yawon bude ido da al’umma ke jan ragama a fadin kasar.
Gregory Bakunzi, wanda ya kafa shirin bunkasa dorewar ci gaba na “Red Rocks Initiative for Sustainable Development”, ya ce masu yawon bude ido daga kasar Sin suna zama muhimmin bangare na kasuwancin yawon bude ido a Ruwanda, musamman yadda kasar take inganta yawon bude ido na mataki mai daraja da ba ya haifar da illa.
A cewarsa, masu yawon bude ido daga kasar Sin suna kara sha’awar ba wai kawai kallon shahararrun goggon birrai na tsaunuka da wuraren shakatawa na kasar Ruwanda ba, har ma da kwarewar harkokin al’adu kamar kyakkyawar cudanya da al’umma, da wasannin gargajiya, da labarai na tatsuniyoyi, da kuma sana’o’in hannu na cikin gida.
Bakunzi ya bayyana cewa, ayyukan yawon bude ido da al’umma ke jan ragama sun samar da alfanu kai-tsaye daga karuwar sha’awar da Sinawa matafiya ke nunawa.
Shirye-shiryen da suka mayar da hankali kan sakar kwando, da girke-girken gargajiya, da cudanyar al’adu sun taimaka wajen kara kudaden shiga ga iyalai da kimanin kashi 20 zuwa 30 cikin 100 a lokutan da aka fi samun cinikin yawon bude ido. (Mai fassara: Abdulrazaq Yahuza Jere)
