Mataimakin firaministan kasar Sin Ding Xuexiang, ya ce aiwatar da kashi na 4 na aikin filin samar da iskar gas na Galkynysh ba tare da tangarda ba, za ta kara daukaka dangantakar Sin da Turkmenistan a bangaren makamashi zuwa wani sabon mataki.
Ding Xuexiang, ya bayyana haka ne jiya, lokacin da ya halarci bikin kaddamar da kashi na 4 na aikin filin samar da iskar gas tare da shugaban al’ummar Turkmenistan kuma shugaban majalisar koli ta Halk Maslahaty, Gurbanguly Berdimuhamedov.
Ya ce fara aikin ba tare da wata matsala ba muhimmiyar nasara ce ga zurfafa hadin gwiwar kasashen biyu, sannan ta bude wani sabon babi a dangantakarsu a bangaren iskar gas.
Ding Xuexiang, ya kuma bayyana fatan hukumomi da kamfanoni masu ruwa da tsaki na kasashen biyu za su yi shirye-shirye cikin tsanaki da aiwatar da aikin bisa kwarewa da inganta shi yadda ya kamata. (Fa’iza Mustapha)
