Sake Jan Damarar Soja Da Japan Ke Yi Karin Alama Ce Mai Hadari

Jam’iyyar LDP ta Japan ta gudanar da babban taronta a ’yan kwanakin da suka gabata, inda ta amince da daftarin shawara da take shirin mika wa gwamnati na neman gyara “takardu uku game da tsaron kasa”. Takardun uku, wato “Dabarun ba da tabbaci ga tsaron kasa”, “Dabarun tsaron kasa”, da kuma “Shirin gina karfin tsaro na matsakaicin lokaci”, an zartas da su ne a karshen shekarar 2022. Hakan alama ce da ke nuna cewa, dabarun tsaron kasar sun sauya daga manufar “kare kai” zuwa bunkasa “karfin mayar da martani”.

Kwatankwacin takardun uku, duk matakan da ke cikin sabon daftarin shawarar da taron na LDP ya amince da shi, sun karkata ne ga tanade-tanaden yaki na dindindin da kuma shiga tsakani na son rai. Kuma suna yunkurin zurfafa shigarwa da fadada karfin soja da shirye-shiryen yaki cikin tsarin kasa, da tattalin arziki da masana’antu, da kuma ra’ayoyin al’umma, ta yadda za su kara janyo manufar tsaron Japan ta sauya zuwa ga alkiblar kai hari da fadada karfin soja.

Daga musanta tarihin mamayar da ta yi a yakin duniya na II da sakamakon hukuncin kotun Tokyo, zuwa kara kudin da ake kashewa a aikin soja da sassauta hana fitar da makaman kare dangi, daga gyara kundin tsarin mulkin zaman lafiya, zuwa sake nazarin “takardu uku game da tsaron kasa” da kuma niyyar gyara “ka’idoji uku na rashin makaman nukiliya”, Japan tana kokarin farfado da ra’ayin nuna karfin soja cikin hanzari.

Musamman ma matakin ta na yin karin gishiri game da barazanar waje da take fuskanta, da kuma amfani da “manufar kare kai” domin bunkasa fadada soja da shirye-shiryen yaki, ya yi kamanceceniya matuka da hanyar kara karfin soja da kasar ta bi wajen kai wa kasashen waje hari kafin yakin duniya na II. Dole ne al’ummar duniya su yi taka-tsantsan kwarai game da hakan.

Darussan tarihi suna nan a gaban idanunmu. A baki Japan tana shelar “zaman lafiya” da “tsaron kasa”, amma a aikace tana ta hanzarta “sake jan damarar soja”. Dole ne al’ummar duniya su hada hannu, su kuma dauki matakai na hakika, don hana farfadowar ra’ayin nuna karfin soja na Japan. (Bilkisu Xin)

Sulaiman

+ postsBio

• Sulaiman

  Muhallin Halittu Da Aka Yi Gado A Kasar Sin Sun Samu Ci Gaba Ta Fuskar Ba Su Kariya
• Sulaiman

  Shugaban Majalisar Bayar Da Shawara Kan Harkokin Siyasa Ta Kasar Sin Ya Yi Kira Da A Raya Dangantakar Gabobi Biyu Na Mashigin Tekun Taiwan Cikin Lumana
• Sulaiman

  Sin Ta Zama Abin Koyi Na Sauyi Da Ci Gaba Ga Kasashe Da Dama, In Ji Shalva Papuashvili
• Sulaiman

  Kasar Sin Na Adawa Da Matakin Amurka Na Amfani Da Tsaron Kasa Wajen Danne Wasu Kamfanonin Sinawa