Ministan ma’aikatar harkokin wajen kasar Sin Wang Yi, ya ce halartar taron kungiyar BRICS da shugaban kasar Sin Xi Jinping ya yi a Indiya, na da matukar muhimmanci ga manufar samar da ci gaba mai inganci a fannin fadada hadin gwiwar kungiyar BRICS. Wang, ya bayyana hakan ne a jiya Lahadi, yayin da yake zantawa da manema labarai dangane da halartar taron BRICS karo na 18 da shugaba Xi ya yi a Indiya a ranakun Asabar da Lahadi.
A cewarsa, da fari ziyarar ta shugaba Xi ta ingiza hadin gwiwar kungiyar ta BRICS, domin kuwa shugaba Xi ya yi kira ga kasashe membobin kungiyar ta BRICS da su samar da mafari na bunkasa ci gaba mai tattare da kirkire-kirkire, da ingiza zaman lafiya da daidaito, da goyon bayan koyi da juna tsakanin mabambantan wayewar kai, da sauya yanayi da bunkasa tsarin jagorancin duniya.
Wang, ya kara da cewa a shekarar 2027, kungiyar BRICS za ta shiga “Shekarar Sin” ta hudu. Dangane da hakan, shugaba Xi ya sanar da aniyar kasarsa, ta amfani da wannan dama wajen yin aiki tare da dukkanin sassa wajen cimma matsaya daya, da bude kofar tunkarar makoma, da fuskantar shekaru 10 masu kima karo na uku na hadin gwiwar kungiyar ta BRICS.
Na biyu kuma, ziyarar ta shugaba Xi ta karfafa matsayin kasashe masu tasowa, inda karkashin manufar mayar da hankali ga sabon zagayen sauye-sauyen kimiyya da fasaha da sauyin akalar masana’antu, Xi ya gabatar da shawarwari, wadanda suka hada da amfani da karfin fasahar AI wajen sabunta tsarin kafuwar masana’antu na BRICS, da cin gajiyar budadden tsarin AI mai game dukkanin sassa, da shawarar hadin gwiwar masana’antun dijital, da ta hadin gwiwar bunkasa masana’antu masu aiki da basira.
Na uku kuma, ziyarar ta shugaba Xi, ta samar da alkibla ga alakar Sin da Indiya, inda shugaban na Sin da firaministan Indiya Narendra Modi, suka gudanar da sahihiyar musaya mai zurfi dangane da mahangar tsare-sare, da batutuwa masu jan hankulansu a tsawon lokaci da ke da tasiri a alakar sassan biyu.
Wang ya ce matsaya mafi muhimmanci da suka cimma ita ce amincewa da bukatar zama abokan hulda. (Saminu Alhassan)
