A yau Lahadi ne shugaban kasar Sin Xi Jinping da takwaransa na Rasha Vladimir Putin, suka aikewa juna sakon taya murnar bikin baje koli karo na 10 na Sin da Rasha, wanda aka bude a birnin Harbin, fadar mulkin lardin Heilongjiang na arewa maso gabashin kasar Sin.
A cikin sakonsa, shugaba Xi ya ce a bana Sin da Rasha ke cika shekaru 30 da kulla dangantakar hadin gwiwa bisa manyan tsare-tsare, kana shekaru 25 da sanya hannu kan yarjejeniyar da sassan biyu suka kulla, dangane da kyakkyawar makwaftaka da hadin gwiwar abota.
Kazalika, shugaba Xi ya ce hadin gwiwar sassan biyu a sassa daban daban ta ci gaba da zurfafa, tare da karfafa, kana ta haifar da manyan nasarori bisa gudummawar da kasashen biyu suka bayar.
Bugu da kari, shugaba Xi ya yi fatan baje koli zai zamo dandali na samar da gudummawa a sassa daban daban ga kasashen biyu, ta yadda za su yi gajiyar fifikon yankin da suke, da gajiyar da za su samar wa juna, da zurfafa hadin gwiwarsu a dukkanin bangarori, da kara ingiza ci gabansu a fannin tattalin arziki da zaman rayuwar jama’a, da ci gaba da kyautata walwalar al’ummun kasashen biyu, ta yadda za su samar da jerin gudummawar daidaito, da ci gaba na dogon lokaci bisa cikakken kawance bisa manyan tsare-tsare a sabon zamani.
A nasa sakon kuwa, shugaba Putin ya ce bikin ya riga ya zama bikin nune-nune mafi girma tsakanin Sin da Rasha, wanda ya samar da dandali ga kasashen biyu na gudanar da tattaunawa kai tsaye kuma mai zurfi. (Saminu Alhassan)
