Shugabar jam’iyyar Kuomintang ko KMT a takaice, Cheng Li-wun, da tawagar da ta jagoranta sun kammala ziyara ta kwanaki 6 a babban yankin kasar Sin, inda suka bar birnin Beijing domin komawa yankin Taiwan a yammacin yau 12 ga wannan wata ta jirgin sama.
A wannan rana da safe, tawagar Cheng Li-wun ta kai ziyara a kamfanin kera motoci na Xiaomi, inda ta gano sabon ci gaban da aka yi nazari da samar da motoci masu amfani da sabbin makamashi a babban yankin kasar Sin.
A ranar 10 ga wannan wata da yamma, tawagar jam’iyyar KMT ta fara ziyara a birnin Beijing, zango na farko shi ne makarantar midil ta jami’ar Tsinghua, inda aka fahimci ayyukan ba da ilmi ta hanyar fasahar AI a makarantar.
A safiyar ranar 11 ga wannan wata dai, tawagar ta ziyarci cibiyar gwada kirkire-kirkire ta Zhongguancun don ganin yadda aka kafa wurin raya fasahohin kirkire-kirkire a fannin amfani da kirkirarriyar basira ta AI a birnin Beijing. Bayan gama ziyarar a wurin, Cheng Li-wun da tawagarta sun yi shawarwari tare da wakilan kamfanonin yin kirkire-kirkiren kimiyya da fasaha don tattauna sabuwar damar hadin gwiwar kimiyya da fasaha a tsakanin gabobin biyu na mashigin tekun Taiwan.
Tun daga ranar 7 zuwa 12 ga wannan wata, Cheng Li-wun ta jagoranci tawagar jam’iyyar KMT da kawo ziyara a lardin Jiangsu, da birnin Shanghai, da kuma birnin Beijing. Wannan ne shugabar jam’iyyar KMT ta sake kai ziyara a babban yankin kasar Sin bayan shekaru 10. (Zainab Zhang)
