Shugabar jam’iyyar Kuomintang ta kasar Sin Cheng Li-wun, ta yi kira da a kara kyautata abota da aminci tsakanin gabobi biyu na mashigin tekun Taiwan. Cheng Li-wun ta yi kiran ne biyo bayan rangadin da ta yi a birnin Shanghai, inda kuzari da kirkire-kirkiren da ta gani a birnin suka burge ta.
Cheng Li-wun wadda ta jagoranci tawagar jam’iyyar Kuomintang, ta je Shanghai daga birnin Nanjing ne ta jirgin kasa mai matukar sauri a ranar Laraba. Kuma wuri na farko da suka fara zuwa shi ne hedkwatar katafaren kamfanin jigilar abinci na Meituan, inda ta ga yadda jirage marasa matuka ke jigilar kai sakonnin, lamarin da ya ba ta damar fahimtar ci gaba cikin sauri da tattalin arzikin bangaren fasahar zamani na babban yankin kasar Sin ke samu.
Da safiyar yau Alhamis kuma, Cheng Li-wun da tawagarta sun yi rangadi a tashar ruwa ta Yangshan da cibiyar bincike da tsara fasalin jiragen sama dake karkashin kamfanin kera jiragen saman kasuwanci a cikin gidan kasar Sin, wanda ya kera jirgin saman fasinja na C919.
Da take zantawa da manema labarai, Cheng Li-wun ta yaba da kyau da ci gaban Shanghai, tana mai tunawa da tarihin birnin a lokacin yaki da kuma sauye-sauyen da suka biyo baya.
Ta ce babu wani abu mafi karfi da ya zarce zaman lafiya. Tana cewa idan aka ba shi lokaci, to zaman lafiya ka iya tabbatar da komai.
Ta bukaci jama’ar gabobi biyu na mashigin tekun Taiwan su ci gaba da rungumar neman ci gaba cikin lumana.
Tawagar ta kama hanyar Beijing daga Shanghai, da ranar yau Alhamis. (Fa’iza Mustapha)
