Sin ta fitar da “Tsarin aiki don tabbatar da kwanciyar hankali da inganta shigo da jarin kasashen waje” a ranar Litinin 22 ga watan nan. Kafafen yada labarai na duniya sun ce wannan muhimmin tsari da Sin ta fitar a farkon shekarar fara aiwatar da shirin raya tattalin arziki da zamantakewar al’umma na shekaru biyar-biyar karo na 15, yana aikewa da wata alama a fili game da fadada bude kasuwarta mai fadi, kuma zai karfafawa kamfanoni masu jarin waje a Sin gwiwa, ta yadda za su kara shiga kasuwannin Sin.
Idan aka duba wannan tsari dalla-dalla, ana iya ganin cewa yana da “cikakkun abubuwa masu amfani”. Tsarin ya kunshi matakai 15 a fannoni biyar, wato fadada izinin shiga kasuwar Sin da inganta saukin zuba jarin kasashen waje, da inganta matakin bunkasa zuba jari, da kuma karfafa tsarin kula da hidimomin jarin kasashen waje, da kuma inganta sarrafa jarin kasashen waje.
Fa’idodin manufofi na zahiri suna baiwa kamfanonin kasashen waje damar kara saurin bunkasa a Sin. Bisa ga kididdigar da aka bayar a shekara ta 2025, kamfanonin kasashen waje sama da 8,000 sun kara zuba jari a Sin, wanda ya karu da fiye da kashi 10% idan aka kwatanta da na shekarar da ta gabaci hakan.
A watanni 5 na farkon wannan shekara, kamfanonin kasashen waje kusan 4,000 sun kara zuba jari a Sin.Yayin da ake ci gaba da aiwatar da shirin karo na 15, kamfanonin kasashen waje za su sami ci gaba “mafi kyau”, “mafi fadi”, “mafi zurfi” kuma “mafi sauki” a kasar Sin.
Kamar yadda yawancin shugabannin kamfanonin kasashen daban-daban suka fada, kamfanonin kasashen waje suna shiga cikin kasuwar Sin sosai, suna kuma hada kai da Sin don samar da kyakkyawar makoma tare. (Amina Xu)
