A yau Talata ne kasar Sin ta yi nasarar harba rokar Lijian-1 Y12, dauke da taurarin dan Adam guda takwas zuwa sararin samaniya. An harba rokar ne da karfe 12 da mintuna 3 na tsakar rana agogon Beijing, daga tashar harba kumbuna ta yankin gwajin fasahohin kirkire-kirkire ta kasuwanci ta Dongfeng, wadda ke arewa maso yammacin kasar Sin. Kuma rokar ta yi nasarar aikewa da taurarin dan Adam din da’irorinsu kamar yadda aka tsara.
Wannan ne karo na 12 da aka yi amfani da samfurin rokar Lijian-1 wajen harba taurarin dan Adam. An kuma kera rokar Lijian-1 ne domin biyan bukatun kasuwar harba kananan taurarin bil’adam, da samar da mabambantan hidimomin harba nau’o’in taurarin dan Adam daban daban, kamar dai yadda babban makerin rokar Lijian-1 Shi Xiaoning ya bayyana.
Kawo yanzu, an yi amfani da nau’o’in wannan rukuni na roka wajen harba taurarin dan Adam sama da 90 zuwa samaniya, inda jimillar nauyin na’urorin da ta aike da’irorin samaniya ya haura tan 12. (Saminu Alhassan)
Discussion about this post