A yau Litinin ma’aikatar cinikayyar kasar Sin ta sanar da kara sassa 10 na Amurka, cikin jerin bangarorin da ta haramta hulda da su, ciki har da kamfanin Aveox Inc, bisa tanadin dokokin kasar na kayyade fitar da hajoji, da ka’idojin fitar da abubuwan da ake iya amfani da su a ayyukan fararen hula da na soji.
Wata sanarwa da ma’aikatar ta fitar, ta ce an dauki matakin ne domin kare tsaro da muradun kasa, da sauke nauyin kasa da kasa na hana yaduwar muggan makamai.
Game da wannan batu, ita ma ma’aikatar kudin kasar Sin ta sanar da haramtawa sassan gwamnatin kasar sayo wasu kayayyaki da wasu kamfanonin Amurka 46 ke sarrafawa. Karkashin wannan sabon mataki, wajibi ne sassa da ke hada-hadar sayo kayayyaki domin gwamnatin Sin, su dakatar da sayen hajojin kamfanonin Amurka da aka zayyana, ciki har da na kamfanonin Lockheed Martin Corporation da Raytheon Missiles & Defense. (Saminu Alhassan)
Discussion about this post